عودة نوابنا من الغربه

وأهي الحكايه خلصت ياعم النائب الهمام وقفل المجلس أبوابه وكل واحد بيتك بيتك عشان هنرش ونعقم واحتمال ناخد المجلس وشين بويه وبعدين انت كنت مشرف المجلس 5سنين قابض واكل شارب متسيط واتحولت بقدرة قادر من فلان الفلاني لسيادة النائب تعظيم سلام بس تفتكر سيادة النائب انك هتقدر تستغفل المواطن المحترم اللي اداك صوته علي امل تكون ضهره وتحقق جزء من طلباته اللي اختارك عشانها وانت بكل جحود اديته ضهرك ومشفش وشك الا في المناسبات تفتكر انك هتقدر تستغفله مرتين ماأظنش وتفتكر انك بمجموعة المتنطعين اللي انت سمنتهم وربرتهم في الخمس سنين علي أمل انهم هيقدروا يبلطجوا علي الناس عشان يجيبوا سيادتك تأنتخ علي حسابهم تاني لو حصل يبقي الناس تستاهل ولو محصلش ورجعوك فلان الفلاني يبقي الناس دي أثبتت أنها تستحق الأفضل وان كان في كلامي شئ ضايقك سيادة النائب السابق فخبرني بالله عليك أين كنت من مشاكل دايرتك طيلة الخمس سنوات وهل استفاد المواطن من وجودك بالمجلس أم استفدت أنت من وجودك به من نفوذ وسلطه وهلم جرا .اعرف أن الوقت قصير قدامك عشان تبدأ في تغير وجهك من جديد وتعيش حبتين في حاله النائب المتواضع اللي لاتفوته مناسبه فسنراك من جديد في كل صوان عزاء وكتب كتاب وحفلات الطهور وأكيد هيكون جنبك المبخراتيه والبلطجيه عشان يفرشولك الطريق بالكدب يهيأ لشخصي الضعيف أننا لن ينطلي ماكان منكم علينا مرة أخري ولن نعطي صوتنا لأبو الهول ليكون ممثلنا في البرلمان القادم .

محمد الطربيلي